孩子成日揞耳、去超市就扭計？可能係聽覺敏感作怪

小朋友成日無端端揞耳仔

前排同一個家長傾開，佢話囡囡欣欣返學嘅情況令佢好頭痛。欣欣三歲，原本讀下午班得10個同學仔，上堂專注力正常，完全冇問題。但一轉上去上午班，變成同20個小朋友一齊之後，欣欣就好似變咗第二個人咁——專注力好差，仲開始出手打其他同學。

媽媽百思不得其解，以為囡囡曳咗。後尾搵職業治療師傾開，先發現原來係聽覺敏感作怪。

聽覺敏感係咩一回事？

簡單嚟講，聽覺敏感嘅小朋友，佢哋嘅耳朵好似裝咗擴音器一樣。我哋覺得正常嘅課室嘈音，對佢哋嚟講可能同置身機場一樣嘈吵。

冷氣機嘅嗡嗡聲、同學玩嘅笑聲、椅子郁嚟郁去嘅摩擦聲，全部聲音一齊湧入佢哋對耳，想避都避唔到。欣欣就係因為突然多咗一倍同學，聲音超出咗佢可以承受嘅範圍，長期處於緊張狀態，最後用「打人」嚟表達：「我真係頂唔順喇！」

呢班小朋友喺嘈雜環境入面，要不斷消耗能量去隔濾聲音，當佢哋頂唔順嘅時候，情緒就會爆出嚟。呢啲行為唔係「曳」，而係身體最真實嘅反應。

點樣觀察小朋友有冇聽覺敏感？

家長可以留意下，小朋友有冇以下情況：

· ❓ 成日無端端揞住對耳

· ❓ 一去到酒樓、超市呢啲多人嘅地方就特別容易扭計

· ❓ 對某啲聲音反應超大（例如吸塵機、風筒、打樁聲）

· ❓ 喺寧靜環境可以專心，一嘈就心浮氣躁

有咩方法可以幫到小朋友？

如果你發現小朋友有類似情況，可以試下呢幾個實用小方法：

✅ 屋企設個「靜音區」

用帳篷、梳化後嘅角落，鋪啲軟墊上去，做一個可以避世嘅小空間。當小朋友開始煩躁或者揞耳，帶佢入去抖抖，等對耳仔休息吓。

✅ 善用法寶隔走噪音

去超市、搭港鐵或者去酒樓飲茶嘅時候，可以俾小朋友戴降噪耳筒，直接幫佢隔走多餘聲音。有時喺屋企開少少白噪音或者柔和音樂，反而可以遮蓋令人困擾嘅突發聲響（例如冷氣機聲、樓上裝修聲）。

✅ 事前預告唔好嚇親

去新地方之前，簡單講定會有咩聲：「一陣我哋去街市，可能會有好多人講嘢同剁豬肉聲，會好嘈㗎。如果你覺得頂唔順，就捉實媽媽隻手，我哋快啲買完就走。」

✅ 接納佢哋嘅反應

當小朋友揞耳或者扭計要走嘅時候，千祈唔好鬧「怕咩啫咁細聲」。試吓認同佢嘅感受：「爸爸知道你覺得好嘈好唔舒服，係咪？我哋一齊抖吓先。」

幾時要尋求專業協助？

如果小朋友嘅聽覺敏感已經影響到日常生活，例如：

· 返學成日因為聲音問題同同學衝突

· 唔肯去某啲必要嘅場所（如酒樓、公園）

· 情緒長期繃緊，响屋企都成日發脾氣

咁就建議及早尋求職業治療師嘅評估同協助。治療師可以透過專業活動，例如聽覺統合訓練、感統遊戲，有系統咁幫小朋友調節同適應，等佢哋唔使再咁辛苦。

職業治療師 Elaine Chan