孩子寫字無力、握筆姿勢怪？了解手仔冇力點樣練
- Elaine Chan
- 3月16日
- 讀畢需時 4 分鐘
已更新：7天前
小手肌肉力量不足——寫字好攰點算好？
好多家長都會發現，小朋友喺寫字嘅時候成日話手攰，或者揸筆揸得好用力，寫出嚟嘅字又淺又亂。其實呢啲情況好普遍，通常唔係小朋友懶或者唔專心，而係因為手部小肌肉發展未成熟，即係小手肌肉力量不足。等我哋一齊了解吓背後嘅原因，同埋可以點樣幫到手。
點解會小手肌肉力量唔夠？
小朋友寫字無力，主要原因離唔開以下幾點：
手握能力發展遲緩： 寫字唔單止係手指嘅運動，而係成隻手，甚至成個上半身嘅協調。由膊頭嘅穩定性，到前臂、手腕嘅郁動，再到手指嘅精細操作，呢個由粗到細嘅發展過程需要循序漸進。當中前三指（拇指、食指、中指）嘅運用固然重要，但最關鍵嘅其實係前二指（拇指同食指）嘅成熟度——我哋揸筆寫字時，主要就係靠呢兩隻手指嚟固定支筆、控制細微嘅郁動。如果前二指運用唔成熟，無力或不夠靈活，小朋友就好容易用錯力，例如死握拳頭、用成隻手臂去畫字，寫冇幾耐就話手攰。
太早學寫複雜字： 喺手部小肌肉未準備好嘅時候，就強迫佢哋寫一啲結構複雜、筆畫多嘅字，例如佢哋嘅中文名，會令佢哋要用唔正確嘅發力方式去彌補，久而久之形成壞習慣，甚至厭惡寫字。
電子產品取代咗傳統玩具： 現代小朋友接觸電子產品嘅時間越嚟越早、越嚟越多，相對嚟講，用手做精細動作嘅機會就減少咗。
簡單嚟講，因為練習嘅時間唔夠，即使過咗幼兒階段，手部功能都可能會出現問題，影響寫字表現。
可以點樣幫到手？（實用建議）：
想提升小朋友嘅小手肌肉力量，最重要係透過遊戲同生活，俾足夠機會鍛鍊雙手，尤其要針對性訓練前二指同前三指嘅力量同協調。以下係一啲可以參考嘅方法：
用玩具練手指（特別係訓練前二指）：泥膠/黏土： 搓圓、壓扁、切開，尤其可以叫小朋友用拇指同食指「搣」一小塊泥膠出嚟。
用玩具夾/鉗仔夾物件： 呢個動作直接鍛鍊前二指嘅力量，可以叫佢夾波子、夾豆放入細樽。
各類用手指玩的玩具： 彈籃球、波子機、射擊玩具射，因為吸引可以重複練習手指力量同習慣
穿珠/入錢入錢箱： 訓練手指嘅靈活性同手眼協調。
砌細粒積木/樂高： 需要用力壓實，對訓練手掌力度好好。
大肌肉運動係基礎，一定要做足：多做攀爬、爬行遊戲： 無論係喺公園爬繩網、喺屋企用枕頭整「障礙賽」爬嚟爬去，定係一啲模仿動物爬行嘅遊戲，都可以好好鍛鍊膊頭嘅穩定性同成隻手臂嘅力量。膊頭夠穩定，寫字時隻手先至可以靈活控制。
去公園玩單槓或者馬騮架： 雙手懸吊住身體嘅重量，可以極速提升手掌嘅抓握力、前臂嘅力量，仲有膊頭嘅穩定能力。呢啲正正就係寫字時需要「揸得穩支筆」嘅力量來源。玩得越多，揸筆就越有力。
幾時需要尋求專業協助？
如果家長嘗試咗以上方法一段時間，小朋友嘅寫字力度、握筆姿勢仍然冇明顯改善，或者寫字時表現出好大嘅抗拒同挫敗感，咁就建議去了解下有關小肌肉及書寫技巧訓練嘅服務內容，或者考慮尋求職業治療師嘅專業協助。
職業治療師可以為小朋友進行全面嘅手部功能評估，了解問題嘅根源，然後設計針對性嘅訓練活動，用專業嘅手法引導小朋友用正確嘅方法發力，逐步建立寫字所需要嘅基礎能力。
總結嚟講： 小朋友寫字無力通常係發展過程中嘅必經階段，家長唔需要太擔心。只要我哋明白佢哋嘅需要，提供多元化嘅手部精細動作遊戲，同埋一定要俾佢哋多做大肌肉運動打好個基礎，再創造輕鬆愉快嘅書寫環境，必要時尋求專業意見，佢哋嘅執筆寫字自然會變得越來越有力、越來越順暢！
【聲明】 （註：上圖為AI生成示意圖，圖中人物與情境僅供參考，如有雷同實屬巧合。）
【關於作者】本文有關兒童**「手部小肌肉發力與執筆」**的專業資訊由陳薏鈴女士（Elaine Chan）撰寫及審閱。Elaine 畢業於香港理工大學職業治療學系，並取得香港中文大學早期幼兒教育碩士學位。她擁有超過20年的兒科臨床經驗，曾任職於醫院管理局兒科部門，並取得美國南加州大學 SIPT 感覺統合認證。多年來服務超過1,000名本地及跨境家庭，專長處理兒童發展、感覺統合支援、自閉症譜系兒童支援。欲了解更多臨床資歷，歡迎瀏覽職業治療師的專業背景。