小朋友寫字反轉、抄書跳行、或者抄漏筆畫? 什麼是「視覺感知」?
- Elaine Chan
- 5月18日
- 讀畢需時 3 分鐘
已更新：7月30日
作為家長，你可能聽過「視覺感知」，但究竟係咩嚟？簡單講，視覺感知唔係指「睇唔睇得清」——嗰啲係視力嘅事。視覺感知係指個腦識得解釋、理解同運用眼睛睇到嘅嘢。
舉個例：小朋友睇到「b」同「d」，視力正常，但視覺感知弱嘅話，個腦就會撈亂，寫字會反轉。又或者玩拼圖時逐塊亂試、搵極都搵唔到件嘢喺邊、抄書跳行跳字、填顏色出晒界、斟水滿瀉、成日撞到傢俬、著鞋調轉左右，甚至唔鍾意睇書——唔係因為唔識字，而係覺得「亂」。以上種種，都同視覺感知有關。
視覺感知同前庭系統有咩關係？
好多家長唔知，前庭系統（內耳裡面感應郁動同平衡嘅系統）同視覺感知發展係好緊密嘅。簡單講，前庭系統係我哋身體嘅「平衡感應器」，而視覺感知就係大腦嘅「影像解讀能力」。呢兩者需要好好配合，先可以令小朋友順暢地閱讀、寫字同活動。
前庭系統負責：
知道我哋個頭同身體喺空間嘅位置
穩定眼球去追蹤物件
協調頭、眼、身體嘅郁動
如果前庭系統發展得唔好，小朋友就會：
好難用雙眼穩定咁追住一個移動物件
睇字容易跳行、甩位
寫字出格、反轉字
坐唔定、成日挨嚟挨去
因為個腦收唔到穩定嘅身體位置訊號，就冇辦法準確處理視覺資訊。換句話說，前庭系統係視覺感知嘅「地基」，地基唔穩，上層嘅閱讀、寫字、抄書能力自然會受到影響。
點解會出現視覺感知發展遲緩？
常見原因包括：
前庭刺激不足： 爬得少、玩盪鞦韆、滑梯、氹氹轉嘅機會少
生活習慣缺乏視覺刺激： 少玩拼圖、看圖砌樂高、尋寶遊戲
感覺統合失調： 個腦處理唔同感覺訊息（視覺、前庭、觸覺等）唔協調
早產或發展遲緩風險： 部分小朋友天生感覺統合較弱
職業治療師會點樣訓練？
我哋可能會先做標準評估或者臨床觀察，然後針對性咁訓練。以下係常見方法：
前庭系統訓練（打好個底）
打鞦韆、氹氹轉、搖搖板、滑板車
目的： 改善眼球穩定同空間感
視覺追蹤同搜尋訓練
用電筒照牆，叫小朋友用眼追住光點
喺一大堆圖案入面搵指定嘅物件（「搵字母遊戲」）
迷宮、連線、找不同
視覺記憶同辨別訓練
睇圖5秒，再憑記憶排返出嚟
用七巧板、積木模仿砌圖
拼圖、配對卡、搵找不同
視覺動作整合訓練
沿直線、曲線、迷宮畫線
仿畫形狀（圓形、正方形、三角形）
剪紙、穿珠仔
家長日常可以做嘅小貼士：
· ✅ 多啲帶小朋友去公園玩： 瀡滑梯、打鞦韆、爬架
· ✅ 玩「I Spy」遊戲： 「我見到紅色圓形嘅嘢，你搵唔搵到？」
· ✅ 玩砌圖、Lego、配對卡
記住，視覺感知能力係可以透過訓練改善嘅。如果你發現小朋友成日寫反字、跳行、抄書慢，或者玩拼圖特別差，不妨去了解下有關小肌肉及書寫技巧訓練嘅服務內容，或者搵職業治療師做個評估及協助，一齊幫小朋友打好個底！
【聲明】 （註：上圖為AI生成示意圖，圖中人物與情境僅供參考，如有雷同實屬巧合。）
【關於作者】本文有關兒童**「視覺感知與讀寫基礎」**的專業資訊由陳薏鈴女士（Elaine Chan）撰寫及審閱。Elaine 畢業於香港理工大學職業治療學系，並取得香港中文大學早期幼兒教育碩士學位。她擁有超過20年的兒科臨床經驗，曾任職於醫院管理局兒科部門，並取得美國南加州大學 SIPT 感覺統合認證。多年來服務超過1,000名本地及跨境家庭，專長處理兒童發展、感覺統合支援、自閉症譜系兒童支援。欲了解更多臨床資歷，歡迎瀏覽職業治療師的專業背景。