小朋友著衫好似打仗？了解孩子的「觸覺過敏」，拆解每日穿搭煩惱

小朋友著親衫都好痛苦咁

「媽咪，好拮呀！」「件衫箍住我，好唔舒服！」每日朝早著衫，屋企就好似戰場一樣，同小朋友為咗著邊件衫拉扯半個鐘，最後大家都一肚氣咁出門？如果呢個情況成日發生，可能唔係小朋友「揀擇」或者扭計，而係佢哋嘅觸覺比較敏感，正在經歷我哋未必感受到嘅不適。

什麼是觸覺過敏？他們的「拮肉」是真的痛

觸覺過敏嘅小朋友，佢哋嘅皮膚感覺接收器特別活躍，好似將音量不自覺咁開到最大。對我哋嚟講舒服柔軟嘅純棉衫，佢哋可能覺得好似「黐滿玻璃纖維」咁刺肉；輕輕掂到嘅衫領標籤，對佢哋嚟講就好似被針拮緊。

呢種唔舒服嘅感覺，係真實存在嘅困擾，唔係「習慣就好」就可以解決，最好係了解一下點樣幫小朋友達到觸覺過敏改善。

---

情景案例：校服帶來嘅困擾

喺治療室入面，成日都會見到因為觸覺敏感而對衣物產生強烈反應嘅小朋友。佢哋可能對恤衫嘅質地、鈕扣嘅觸感極度反感，每日著衫都要同媽媽拉扯一番。有啲小朋友甚至會因為太唔舒服，返學前忍唔住將件衫嘅鈕扣一次過扯晒落地。

媽媽見到嘅一刻可能好震驚，但同時都可以嘗試去了解仔仔行為嘅原因：原來小朋友一直以嚟嘅反抗，唔係百厭，而係身體嘅唔舒服已經去到佢忍受唔到嘅極限。小朋友未必識得用說話表達「我好唔舒服」，佢哋只能用行為——喊、逃避、發脾氣——嚟話俾我哋知。

觀察小貼士：小朋友有冇以下跡象？

觸覺敏感嘅表現唔止局限於著衫，可以留意吓小朋友會唔會有以下情況：

· 衣著方面：對某啲質地（如羊毛、人造纖維）、衫領太緊、衫袖太長，或者衫入面嘅標籤特別抗拒，成日扯衫袖、扯襪頭。

· 日常自理：剪頭髮、洗面、刷牙、剪指甲嘅時候會特別躁底，極力逃避。

· 飲食方面：對某啲食物嘅質地同溫度（例如杰身、有粒粒、太黏、太凍或者有氣嘅飲品）極度抗拒，唔關味道事。

· 身體接觸：唔鍾意赤腳踩草地或沙地，同人擁抱時會僵硬、避開。

· 自我調節：成日搣手指、咬指甲，可能係用另一種感覺嚟蓋過身體其他唔舒服嘅觸感。

拆解「觸覺地雷」：四招實用小建議

照顧觸覺敏感嘅小朋友，需要多啲耐性同方法。以下幾招可以幫到小朋友慢慢適應，同衣物舒服相處：

1. 由內到外「反轉」著

買衫返嚟第一件事，就係剪走曬所有衫褲嘅標籤！同小朋友探索一下乜嘢質地同剪裁嘅衫會比較舒服。

2. 著衫前做「大壓力按摩」

著衫前，用掌心或者觸覺刷（可諮詢職業治療師），用力均勻咁幫小朋友手、腳同背部做大壓力按摩。呢個動作有助調節佢哋嘅觸覺系統，等身體準備好接受衣服嘅接觸，感覺會穩定啲。

3. 玩「脫敏」小遊戲，輕鬆接受新感覺

可以透過遊戲嚟幫小朋友慢慢適應唔同嘅觸感。準備一個「觸感箱」，入面放滿唔同質地嘅安全物件（例如豆、米、絨毛球、海綿、牙刷），同小朋友一齊伸手去摸，邊玩邊描述感覺（「呢個軟淋淋」、「呢粒硬掘掘」）。目的係等佢哋喺輕鬆氣氛下，慢慢接受更多觸覺刺激。

4. 由佢自己揀，增加掌控感

預先揀定2-3件質地比較「安全」、佢接受到嘅衫俾佢揀。由細微嘅選擇開始，可以幫佢減低對著衫嘅焦慮同抗拒。

何時需要尋求專業協助？

如果試咗以上方法，小朋友嘅情況都冇改善，或者觸覺敏感已經嚴重影響日常生活、社交同學習，咁就建議盡早尋求職業治療師嘅評估同協助。

職業治療師 Elaine Chan