自閉症小朋友成日發脾氣？從感官找出原因

小朋友成日發脾氣

前庭覺過敏——對移動嘅恐懼

作為家長，當你見到小朋友唔肯玩鞦韆、唔敢行樓梯、甚至排隊轉堂都表現得好緊張，你可能會諗：「點解人哋小朋友玩得咁開心，我個仔女就驚青成咁？」或者老師可能會同你反映：「佢成日企埋一邊，唔合群㗎！」、「叫極都冇反應，唔知係咪聽唔明？」

先唔好自責，亦唔好急住怪責小朋友。我哋一齊嚟了解吓，孩子嘅行為背後，可能隱藏住一個好重要嘅原因——前庭覺過敏。

---

什麼係前庭覺？

前庭系統係我哋身體入面負責平衡嘅「內置感應器」，佢喺內耳入面，幫我哋感知身體係咪移動緊、係咪傾斜、係咪轉緊。簡單講，佢令我哋知道「我係咪企得穩」、「我有冇就嚟跌親」。

對於前庭覺過敏嘅小朋友嚟講，呢個感應器太過敏感，佢哋嘅身體成日誤判環境有「跌倒風險」，所以會持續處於緊張狀態。

---

前庭過敏嘅小朋友可能會...

· 怕高：連好矮嘅滑梯都唔敢玩

· 怕玩鞦韆：輕輕搖幾下都喊

· 怕搭電梯：覺得上升下降嘅感覺好恐怖

· 怕行樓梯：尤其係向下望嗰陣

· 怕被人撞到：排隊、轉堂、人多嘅地方特別緊張

· 怕斜坡：行斜路會捉到實

---

情景個案：四歲樂樂嘅故事

四歲嘅樂樂返咗幼稚園大半年，但老師從未聽過佢講嘢。每當户外活動時間，其他小朋友衝去玩滑梯、盪鞦韆，樂樂永遠係企埋一邊，靜靜噉望住同學玩。

老師最初以為樂樂只係怕醜，鼓勵佢多啲參與。但老師慢慢發現，樂樂連課室入面嘅簡單指令，例如「拎本書出嚟」或者「排隊洗手」，都好似聽唔明咁，完全冇反應。

老師開始擔心：「樂樂係咪認知發展有問題？」於是約見家長傾訴。

媽媽都好困惑：「佢喺屋企唔係咁㗎，會講嘢，會同我哋玩，點解返學就成個人變晒？」

後來經過職業治療師評估，發現樂樂有嚴重嘅前庭敏感。

原來樂樂唔係唔想參與，而係見到其他小朋友跑跑跳跳，自己嘅身體已經發出警號：「好危險！會跌親！」長期處於緊張狀態下，樂樂嘅大腦根本冇多餘容量去處理老師嘅說話，更加唔好講要開口回應。

佢嘅「唔出聲」、「企埋一邊」、「好似聽唔明」，其實係身體嘅自我保護機制。

---

點解前庭過敏會引起情緒問題？

想像一下，如果你每日返工，辦公室嘅地板成日好似喺度搖緊，你行每一步都要就住就住，驚跌親；同事行過少少風吹草動，你都覺得會俾人撞跌。你仲有冇心情專心做嘢？仲有冇精神同人傾偈？

前庭過敏嘅小朋友就係生活喺噉嘅世界入面。佢哋嘅身體長期處於「戒備狀態」，消耗大量精神能量去維持平衡，結果：

· 冇精神聽人講嘢 → 好似「聽唔明指令」

· 冇心情同人互動 → 睇落「怕醜」、「唔合群」

· 持續緊張焦慮 → 容易情緒爆煲、扭計

前庭過敏嘅小朋友，生活喺一個充滿「危險」嘅世界入面，佢哋嘅情緒問題，往往源自對身體失去控制嘅恐懼。

---

家長可以觀察啲咩？

如果你懷疑小朋友可能係前庭過敏，可以留意以下情況：

· 動態遊戲：玩鞦韆、滑梯、氹氹轉嘅時候會唔會極度抗拒？

· 日常環境：搭電梯、行樓梯、行斜路會唔會特別驚青？

· 人多地方：排隊、轉堂、去商場會唔會特別緊張？

· 身體姿勢：坐椅仔嘅時候會唔會成日扶到實一實？

· 情緒反應：响某啲環境特別容易忟憎、喊、扭計？

---

想同家長講幾句心底話

每個父母都希望自己嘅孩子開心返學、同人玩得投入。但當你見到小朋友驚青退縮，甚至因為緊張而「唔聽話」，請記住：

佢哋唔係「揀擇」，唔係「怕醜」，唔係「曳」

佢哋只係用身體話俾你知：「我嘅感官世界好辛苦呀！」

前庭過敏唔係病，而係一種感官處理嘅特質。只要我哋明白背後嘅原因，就可以用更合適嘅方式去支持孩子。

如果你發現小朋友嘅情況唔識點處理，或者前庭敏感已經嚴重影響日常生活（例如返學、社交、情緒），建議盡早尋求職業治療師評估同埋協助。職業治療師可以幫手確認小朋友嘅感官需要，同家長一齊行呢條路。

每個行為都係一種溝通，孩子唔識講，我哋就要識得睇。

職業治療師 Elaine Chan